नाशिक महानगरपालिकेचीनंदिनी स्वच्छतेसाठी वसुंधरा सप्ताह स्वच्छता मोहीम
digitalnashik_admin 
नाशिक | दि. २६ एप्रिल २०२५ :
नाशिक महानगरपालिकेने जागतिक "माझी वसुंधरा सप्ताह" साजरा करताना "वसुंधरा वाचवा, वसुंधरा सजवा" या ब्रीदवाक्यानुसार "माझी नंदिनी, माझी जबाबदारी" ही विशेष नदी स्वच्छता मोहीम यशस्वीपणे राबवली.
या उपक्रमाचे स्वागत करताना अतिरिक्त आयुक्त करिष्मा नायर यांनी महानगरपालिका नदी संवर्धनासाठी कटिबद्ध असल्याचे स्पष्ट केले. त्यांनी नागरिकांना देखील नदी स्वच्छतेमध्ये सक्रिय सहभाग घेण्याचे आवाहन केले. "नदी आपली जीवनदायिनी आहे. तिचे रक्षण करणे आपली सामूहिक जबाबदारी आहे," असे त्यांनी सांगितले.
या मोहिमेमध्ये "ईलाइट क्लब ऑफ नाशिक" या सामाजिक संस्थेने पुढाकार घेतला. महानगरपालिका शिक्षण विभाग व स्वच्छता विभाग यांच्या सहकार्याने १०० हून अधिक स्वयंसेवकांनी नंदिनी नदी पात्रातील ५०० किलोपेक्षा अधिक कचरा गोळा केला. संकलित कचऱ्याची विल्हेवाट महानगरपालिकेच्या माध्यमातून करण्यात आली.
कार्यक्रमाच्या समारोपप्रसंगी अतिरिक्त आयुक्त करिष्मा नायर यांच्या मार्गदर्शनाखाली विद्यार्थ्यांनी व स्वयंसेवकांनी "माझी वसुंधरा, माझी जबाबदारी" या संकल्पनेखाली पर्यावरण संरक्षणाची प्रतिज्ञा केली. यावेळी त्यांनी पर्यावरण संवर्धन, स्वच्छ व हरित जीवनशैली आणि आगामी हरित कुंभबाबत मोलाचे मार्गदर्शन केले.
ही संपूर्ण मोहीम कर उपायुक्त तथा घनकचरा व्यवस्थापन संचालक अजित निकत व उपायुक्त पर्यावरण तथा गोदावरी संवर्धन नितीन पवार यांच्या मार्गदर्शनाखाली पार पडली. यावेळी महानगरपालिका शिक्षण विभाग, घनकचरा विभाग व मनपाचे विविध विभागाचे अधिकारी व कर्मचारी मोठ्या संख्येने सहभागी झाले होते.
नाशिक महानगरपालिकेच्या या उपक्रमामुळे नंदिनी नदी स्वच्छतेबाबत सकारात्मक जनजागृती निर्माण झाली असून, पर्यावरण रक्षणासाठी नागरिकांमध्ये जागृत निर्माण झाली असल्याचे दिसून आले.
