व्ही.एन.नाईक महाविद्यालयाला सावित्रीबाई फुले पुणे विद्यापीठाचा उत्कृष्ट महाविद्यालय पुरस्कार
digitalnashik_admin
सावित्रीबाई फुले पुणे विद्यापीठाचा या वर्षीचा उत्कृष्ट महाविद्यालय पुरस्कार नासिक क्रांतिवीर वसंतराव नारायणराव नाईक शिक्षण प्रसारक संस्थेचे कला, वाणिज्य व विज्ञान महाविद्यालयास घोषित झाला आहे. पुणे,नाशिक व अहिल्यानगर या विद्यापीठ क्षेत्रातील महाविद्यालयाला उत्कृष्ट महाविद्यालय पुरस्कार विद्यापीठ स्थापना दिनानिमित् वितरित केला जातो.शैक्षणिक वर्ष २०२४-२५ साठी तज्ज्ञ समितीने क्रां.व्ही.एन.नाईक शिक्षण संस्थेच्या नाशिक येथील महाविद्यालयाची निवड पुरस्कारासाठी केली आहे. विद्यापीठ स्थापना दिनानिमित्त दि. १० फेब्रुवारी २०२५ रोजी महाविद्यालयाला तीन लाख रुपयाचे बक्षीस स्मृतिचिन्ह व प्रमाणपत्र देऊन सन्मानित केले जाणार आहे.उत्कृष्ट महाविद्यालय पुरस्कार मिळाल्याबद्दल संस्थेचे अध्यक्ष कोंडाजीमामा आव्हाड,सरचिटणीस हेमंत धात्रक, उपाध्यक्ष उदय घुगे,सहचिटणीस दिगंबर गीते यांनी महाविद्यालयाचे प्राचार्य डॉ.संजय सानप व महाविद्यालयातील सर्व शिक्षक, शिक्षकेतर सेवक व विद्यार्थ्यांचे अभिनंदन केले आहे.सावित्रीबाई फुले पुणे विद्यापीठाच्या तज्ज्ञ समितीने महाविद्यालयाला भेट देऊन, अध्यापन,संशोधन,विद्यार्थीकेंद्री उपक्रम,चर्चासत्र व कार्यशाळांचे आयोजन,कौशल्याधारित उपक्रमांचे आयोजन,पर्यावरण संवर्धन उपक्रम,पायाभूत सुविधा,गुणवत्तावाढ व अभ्यासपूरक व अभ्यासेतर उपक्रमांचे यशस्वी आयोजन या मुद्यांच्या आधारे महाविद्यालयाचे मूल्यमापन करून महाविद्यालयाची निवड उत्कृष्ट महाविद्यालय पुरस्कारासाठी केली अशी माहिती महाविद्यालयाचे प्राचार्य डॉ.संजय सानप यांनी दिली.तसेच संस्थेचे सर्व पदाधिकारी,विश्वस्त, व संचालक मंडळ यांचे मार्गदर्शन व महाविद्यालयातील सर्व शिक्षक, शिक्षकेतर सेवक,विद्यार्थी व पालक यांच्या सामूहिक प्रयत्नांमुळे महाविद्यालयाला उत्कृष्ट महाविद्यालय पुरस्कार प्राप्त झाला अशी भावना प्राचार्य.डॉ.संजय सानप यांनी व्यक्त केली.
