दैनंदिन कार्यातील कार्यक्षमता वाढविण्यासाठी ‘एआय अनझिप्ड’ पुस्तक उपयुक्त ठरेल : मुख्यमंत्री देवेंद्र फडणवीस
digitalnashik_admin 
मुंबई, दि.८: ‘एआय अनझिप्ड’ या पुस्तकातून कृत्रिम बुद्धिमत्तेचा (AI) दैनंदिन कार्यातील कार्यक्षमता वाढविण्यासाठी उपयोग होईल. कृत्रिम बुद्धिमत्तेमागील अद्ययावत तंत्रज्ञान, विद्यार्थी व दैनंदिन कामकाजात एआय वापरणाऱ्यांना हे पुस्तक उपयोगी ठरेल असे मत मुख्यमंत्री देवेंद्र फडणवीस यांनी व्यक्त केले.
आज जागतिक महिला दिनाचे औचित्य साधून मुख्यमंत्री देवेंद्र फडणवीस यांच्या शुभहस्ते ‘एआय अनझिप्ड’ या रतन टाटा महाराष्ट्र राज्य कौशल्य विद्यापीठाच्या कुलगुरु प्रा.डॉ. अपूर्वा पालकर यांच्या पुस्तकाचे सह्याद्री अतिथीगृह, मलबार हिल, मुंबई येथे प्रकाशन झाले.
याप्रसंगी उपमुख्यमंत्री एकनाथ शिंदे, कौशल्य, रोजगार, उद्योजकता व नाविन्यता मंत्री मंगलप्रभात लोढा, रतन टाटा महाराष्ट्र राज्य कौशल्य विद्यापीठाच्या कुलगुरु प्रा.डॉ. अपूर्वा पालकर,डॉ. अमित जाधव, प्रकाशक मंदार जोगळेकर, रतन टाटा महाराष्ट्र राज्य कौशल्य विद्यापीठाचे कुलसचिव डॉ. राजेंद्र तलवारे उपस्थित होते.
‘एआय अनझिप्ड’ या पुस्तकातून AI चा दैनंदिन कार्यातील कार्यक्षमता वाढविण्यासाठी AI चा उपयोग, कृत्रिम बुद्धिमत्तेमागील अद्ययावत तंत्रज्ञान, कृत्रिम बुद्धिमत्तेचा उद्योग क्षेत्र, आरोग्य सेवा, शिक्षण या क्षेत्रातील उपयोग, एआयचा उपयोग कसा व करावा, याची माहिती तसेच एआयच्या 500 हून अधिक ओपन सोर्स टूल्स (Open Source Tools) आणि कार्यक्रमांची माहिती देण्यात आली आहे. जेणेकरुन सर्व महिला, विद्यार्थी व दैनंदिन कामकाजात AI वापरण्यासाठी लोकांना उद्युक्त करायला हे पुस्तक उपयोगी होईल.
या प्रसंगी मुख्यमंत्री देवेंद्र फडणवीस यांनी या पुस्तकाच्या लेखनाबद्दल कुलगुरू डॉ. अपूर्वा पालकर यांचे अभिनंदन केले. तसेच रतन टाटा महाराष्ट्र राज्य कौशल्य विद्यापीठातर्फे विद्यार्थिनी व महिलांच्या सक्षमीकरणासाठी सुरु असलेल्या Code Without Barriers, AI Inititive with Microsoft ज्यामध्ये 10,000 विद्यार्थिनी व महिलांचे प्रशिक्षण सुरु आहे, याचेही कौतुक केले.
कौशल्य, रोजगार, उद्योजकता व नाविन्यता मंत्री मंगल प्रभात लोढा यांनी या पुस्तकाचे कौतुक करुन हे पुस्तक नक्कीच सर्व महिला, विद्यार्थ्यांना व दैनंदिन कामकाजात AI वापरण्याऱ्या नव उद्योजक, संशोधक यांना उपयोगाचे ठरेल, असे मत व्यक्त केले.
